Cebuano news: Qualifying test pagka school principal gipahibalo sa DEpEd

By Leandria Pagunsan

DUMAGUETE CITY, Agosto 10 (PIA) — Ang DepEd mipagawas ug tamdanan alang sa ipahigayon nga qualifying test alang sa pagka school principal sa mga tunghaang publiko karong tuig 2013.

Namahayag si DEpEd Sec. Armin Luisitro nga ang gitakda nga pasulit mao ang himoon nga sumbanan pagpili ug takus nga mangulo sa public basic education sector nga makahimo sa mga buluhaton isip school head mismo sa unang adlaw sa iyang pagtrabaho.

“It is important that our school heads go through a strict screening process to ensure that we only get the best educators in our bureaucracy” matud pa ni Luisitro.

Ang DepEd Memo No. 132 series of 2013 nag pahibalo nga ang pasulit nga himoon karong tuiga pagka Principal 1 bukas alang sa tanan nga interesado ug kwalipikado nga aplikante lakip na kadtong gikan sa Reclassification of School Head Positions.

Ang aplikante kinahanglan nga adunay kasinatian isip Head Teacher, Teacher-in-charge, Master Teacher ug Teacher 3.

Ang maong pasulit magalakip sa mga aspeto sa school leadership, instructional leadership, ability to create a learning climate, professional human resource development, parent involvement & building communities, school management & daily operations, personal integrity & interpersonal sensitivity, English language proficiency ug reading comprehension.

Ang pasulit gitakda nga himoon karong Disyembre 8, 2013 ug ang katapusang adlaw pagpangdawat ug aplikasyon sa mga division offices kutob sa Nobyembre 4, 2013. (FCR/LPagunsan/PIA-7, NegOr)

Advertisements

Cebuano news: Inflation target nakab-ot sa gobyerno

By Leandria Pagunsan

DUMAGUETE CITY, Agosto 12, 2013 (PIA) — Ang National Economic & Development Authority (NEDA) mipahibalo nga ang pagkunhod sa presyo sa pagkaon ug ubang palaliton nakab-ot sa bulan sa Hulyo karong tuiga.

Usa kini ka timailhan nga nagmalamposon ang gobyerno pagkab-ot sa 3.0 hangtud 5.0 porsyento nga inflation rate karong tuiga.

Subay sa gikataho sa National Statistics Office nga ang inflation rate nga natala sa bulan sa Hulyo 2013 ni kunhod ug 2.5 porsyento kung itandi sa miagi nga tuig.

Matud pa ni Socioeconomic Planning Secretary Arsenio Balisacan ang mi rehistro nga inflation rate sa bulan sa Hulyo 2013 ang pinaka mubo sa miagi nga upat ka tuig.

Ang inflation rate mao ang porsyento sa pagtaas sa presyo sa mga palaliton ug serbisyo nga base sa kwentada sa Consumer Price Index (CPI).

Ang padayon nga pag lig-on sa presyo sa mga palaliton nagpaila nga nag malamposon ang gobyerno paghatag ug kasulbaran sa kahimtang sa ka gutom ug ka pobrehon aron makab-ot ang gipangandoy nga kauswagan. (FCR/LPagunsan/PIA-7, NegOr)

Cebuano news: P2.8B alang sa mga bag-ong hospitals ug health centers

By Leandria P. Pagunsan

DUMAGUETE CITY, Agosto 8, 2013 (PIA) — Agi ug suporta sa pagpalapad sa programa alang sa maayong panglawas ni Presidente Aquino, mipagula ug P2.8 bilyon ang Dept. of Budget & Management (DBM) ngadto sa Dept of Public Works & Highways (DPWH) alang sa ipatuman nga Health Facilities Enhancement Program (HFEP) nga dumala-on sa Dept. of Health.

Ang maong badyet gikuha gikan sa DPWH 2013 General Appopriations Act.

Gihimong komprehensibo ang pagpauswag sa mga public health facilities sa gobyerno aron mahatagan ug maayong serbisyong panglawas ang katawhang Pilipino ubos sa programa nga Millenuim Development Goals for Public Health by 2015.

Palamboon ang mga publikong tambalanan ug mga rural health centers aron mahatagan ug quality health care ug emergency services ang tanang lugar sa Pilipinas matud pa ni DBM Secretary Florencio Abad

Ang HFEP mopausbaw sa mga government health facilities sa tibook nasud sa 512 ka regional health units (RHUs), 363 ka Barangay Health Stations (BHSs), 147 ka mga district hospitals ug 20 ka provincial hospitals.

Ubos niining programaha mahatagan ug pagtagad ang mga Barangay Health Stations (BHSs) ug Rural Health Units (RHUs) aron makahatag kini ug hustong serbisyo ilabi na sa paanakan aron ma menosan ang mga insidente sa pagkamatay sa mga inahang samkon o human ba hinoon sa panganak ug aron usab malu-agan ang nagpunsisok nga mga publikong tambalanan.

Positibo ang DBM nga ang pag gasto sa kwarta sa gobyerno alang sa infrastructure ug social services mopalambo sa ekonomiya sa nasud ug makahatag ug benepisyo sa katawhang Pilipino. (mbcn/LPPagunsan/PIA7-Negros Oriental)