Cebuano news: PCW, IRRI ug DA nagkahiusa pagpalambo sa kababayen-an sa natad sa agrikultura

By Leandria Pagunsan

DUMAGUETE CITY, Agosto 8, 2013 (PIA) — Ang Phil.Commission on Women (PCW), sa pakigtambayayong sa International Rice Research Institute (IRRI) ug sa Department of Agriculture, mohimo sa pinaka unang higayon sa gitawag ug “Women in Rice Farming” Open Dialogue ug Exhibit karong Agosto 8, 2013 didto sa IRRI headquarters sa Los Banos, Laguna.

Kini nga kalihukan mo tigom sa mga pangulo gikan sa nagkalain-laing sektor ug mopasundayag sa gitawag ug Art Rice Technologies sa IRRI, lakip na ang kalamboan sa Gender & Development (GAD) , climate change ug environmental sustainability.

Si IRRI Board of Trustees Chairperson Emerlinda Roman, DA Undersecretary Berna Romulo-Puyat, Senators Cynthia Villar, Pia Cayetano ug Grace Poe-Lamanzares ug ang veteran journalists nga sila si Maria Ressa ug Tina Monzon Palma ang gilauman nga motambong sa maong kalihukan.

Ang “Women in Rice Farming” maoy usa sa pinakadayeg sa gihimong kasaulogan sa National Year of Rice 2013. (mbcn/LPP/PIA7-NegOr)

Advertisements

Cebuano news: NORDAPC mihan-ay ug kalihukan batok sa ginadili nga droga

By Leandria P. Pagunsan

DUMAGUETE CITY, Aug 7 (PIA) — Ang Negros Oriental Drug Abuse & Prevention Council (NORDAPC) miawhag sa mga myembro nga ahensya sa NORDAPC pagpadayon sa mga programa ug kampanya batok sa ginadili nga droga.NORDAPC action officer nga si Fernando Martinez miingon nga isip pagpangandam sa Drug Abuse Prevention week karong bulan sa Nobyembre, misugyot siya ngadto sa DepEd nga mopahigayon ug inter-school contest sa Drug Prevention Program isip information drive nga gi tumong sa mga estudyante aron malikay sila sa bisyo sa ginadili nga droga.

Maghimo usab ug mga drug leaflets ug uban pa nga IEC materials nga ipanghatag sa mga eskwelahan aron magiyahan ang mga estudyante sa mga dautang epekto sa droga.

Mipahibalo usab si Martinez nga mopahigayon ang NORDAPC ug usa ka adlaw nga enhancement seminar mahitungod sa Court Procedures on Illegal Drug Cases didto sa Sidlakang Negros Village karong Agosto 2. Ang invited speaker niini mao si Judge Rafael Cresecencio Tan ug laing tinugyanan sa PDEA Regional Office nga mohatag usab ug mga ulahing kalamboan sa PDEA.

Nagpahibalo usab si Martinez nga giwagtang na sa Land Transportation Office (LTO) ang drug test sa mga aplikante nga mo renew ug driver’s license.

Sa gipahigayon nga tigom sa NORDAPC bag-ohay pa lamang, ang PNP sa probinsya mireport nga nakahimo sila ug duha ka buy bust operations, duha ka pagsikop sa akto nga paggamit ug ginadiling droga ug laing unom ka pagsikop sa lain-laing higayon.

Ang PDEA mipahibalo nga padayon ang ilang pagmonitor sa nagkalain-laing kalihukan sa ginadiling droga dinhi sa probinsya, pagkuha ug paghatag sa mga impormasyon subay sa ilang watchlist.

Isip gitahasan nga Special Drug Court, ang RTC branch 30 nga gihuptan ni Judge Rafael Cresecenio Tan nakaproceso kini ug onse (11) ka drug cases diin siyam niini ang convicted ug duha ang acquitted.

Onse (11) ka tunghaang publiko sa DepEd Negros Oriental ang nakasumiti sa ilang accomplishment report sa ilang gipahigayong kalihukan sa Drug Prevention sama sa advocacy program, poster & slogan making contest, film showing, pag mugna ug anti-drug team ug pagpahigayon ug mga seminars. (mbcn/LPP/PIA7-NegOr)

Tags:

Cebuano news: BSP mipasidaan sa publiko sa gipakatap nga pekeng mga cheke

By Leandria P. Pagunsan

DUMAGUETE CITY, Hulyo 31 (PIA) — Ang Bangko Sentral ng Pilipinas (BSP) mipasidaan sa publiko nga mag bantay sa mga katawhang mangingilad nga mopakatap ug peke nga mga cheke nga kunohay gikan sa BSP o sa kanhi-ay nga Central Bank of the Philippines.Isip modus operandi sa mga mangingilad, magpa aron ingnon sila nga mga tinugyanan sa BSP nga mohangyo ug kwarta bugti sa cheke nga mo kantidad ug milyon nga kunohay gikan sa BSP.

Kini giklaro sa BSP nga wala sila gapang isyu ug susama nga mga cheke ug dili usab sila mogarantiya ug cheke o dokumento sa mga tawo o grupo ba hinoon.

Isip financial regulator, ang BSP mo pahigayon lamang ug mga transaksyon ngadto sa mga financial institutions nga ubos sa ilang pagdumala.

Kini nga pahibalo gikan sa Financial Consumer Affairs Group sa BSP nga gi tumong aron ma giyahan ang financial know-how sa mga kunsumidor ug aron usab ma panalipdan ang publiko sa mga malimbongon nga katawhang ga palakat sa mao nga scam.

Alang sa dugang kasayoran mahitungod niini, mahimong makiglambigit sa BSP Financial Consumer Affairs Group pinaagi sa ilang e-mail address nga: consumeraffairs@bsp.gov.ph. (mbcn/LPP/PIA7-NegOr)