Cebuano News: Duterte, may P10T pinaskohan sa mga kawani sa gobyerno

By Elvira Bongosia

Mahimong malipayon ang pagsaulog sa Pasko sa mga kawani sa gobyerno human gilagdaan ni Presidente Rodrigo Roa Duterte ang Ad­ministrative Order No. 19 alang sa Service Re­cognition Incentive (SRI) nga dili molapas og P10,000.

Apil sa mga ma­kadawat og P10,000 in­sentibo karong Dis­yembre ang mga civilian personnel sa national government agencies, kauban ang mga nagtrabaho sa State Universities and Colleges (SUCs) ug government-owned and controlled corporations (GOCCs), mga pulis ug sundalo, bombero, mga kawani sa Bureau of Jail Ma­nagement and Penology, Bureau of Corrections, Philippine Coast Guard ug National Mapping and Resource Information Authority.

Ang mga kwalipikadong makadawat sa P10,000 mao ang mga civilian personnel nga naa sa regular, contractual ug casual positions, apan dili apil niini ang mga consultant, mga trabahante nga adunay job contracts (pakyaw) ug student trainees.

Gitumbok sa admi­nistrative order sa Presidente nga angay lamang mahatagan og pag-ila ang mga kawani sa ilang dili mahangyong kontribusyon sa paghatag og serbisyo sa publiko.

“Government emplo­yees deserve to be rewarded to recognize their collective and unceasing participation in and invaluable contribution to the Admi­nistration’s continuing efforts toward the establishment of streamlined go­vernment processes and more responsive delivery of public services,” matud pa sa direktiba ni Duterte.

Makadawat usab og SRI ang mga kawani sa lokal nga kagamhanan apil na ang mga naa sa barangay level apan mag-agad kini sa ilang nahabiling pondo.

Ang P10,000 insentibo gipaabot nga madawat sa mga kawani sa gobyerno sugod Disyembre 20.

Cebuano News: Crackdown batok illegal recruiters, gimando ni Duterte

By Elvira Bongosia

Gimanduan ni Presidente Rodrigo Duterte ang Department of Labor and Employment (DOLE) ug Department of Social Welfare and Development (DSWD) nga hingosgan ang operasyon batok sa illegal recruiters.

Sa iyang mensahe atol sa awarding ceremony alang sa Presidential Award for Child-Friendly Municipalities and Cities sa Malakanyang niadtong Biyernes, miingon ang Presidente nga angay gayud masikop ang mga illegal recruiters.

“My order is to really get them. You should know where to fish for them,” matud pa ni Duterte.

Partikular nga gimanduan sa Presidente si DSWD Kalihim Rolando Bautista sa paghimo og mas maayong paagi aron masumpo ang mga illegal recruitment.

“I’m sending him a message now that you have to do more. Since you are a military man, then I hope you can come up with a structure— a bigger one —to go after itong (illegal) recruitment. And so goes for the Department of Labor,” mensahe sa Presidente kang Bautista.

Gipahinumdom ni Duterte kun gi-unsa pagduol kaniya sa mga ginikanan sa illegally recruited teenagers nga may edad 16 ug 17 nga nakaabot sa Middle East pinaagi sa gi-pekeng mga dokumento.

Nagpahayag usab og kasubo ang Presidente sa mga naagiang pagmaltrato ug sexual abuses sa pipila ka mga Overseas Filipino Workers (OFWs).

Sa lahing mensahe sa Presidente niadtong Huwebes, gitandi ni Duterte ang mga illegal recruiters sa mga tigpayuhot og ilegal nga droga.

Kayong mga recruiter, I am putting you on the level na parang shabu rin,” matud pa ni Duterte.

Cebuano News: Brgy, SK elections sa Disyembre 2022 na

By Elvira Bongosia

Sa Disyembre 2022 na ipahigayon ang Barangay ug Sangguniang Kabataan (SK) election human gilagdaan ni Presidente Rodrigo Duterte ang balaod nga mag-oktaba sa maong piniliay nga gitakda untang ipahigayon karong umaabot Mayo 11, 2020.

Gilagdaan ni Presidente Rodrigo Duterte ang Republic Act No. 11462 o balaod alang sa postponement sa barangay ug SK elections niadtong Martes, Disyembre 3.

Nakalatid sa enrolled version sa maong balaodnon nga gitakda ang sunod nga piniliay sa pambarangay ug SK elections sa Disyembre 5, 2022 sa tibuok nasod.

Gawas sa barangay ug SK elections sa maong tuig, ipahigayon usab ang Presidential election sa Mayo 2022.

Human sa 2022, ipahigayon ang barangay ug SK elections matag tulo ka tuig.

Sa paglagda sa Presidente sa RA No. 11462, mahimong epektibo na ang pagpa-uswag sa termino sa mga kasamtangang SK ug mga opisyal sa barangay nga napili niadtong Mayo 2018 Barangay ug SK elections.

Tungod sa maong pag-oktaba, mahatagan og kahigayonan ang mga kasamtangang opisyal nga nagdumala karon aron matapos ang ilang mga nasugdang proyekto ug mapadayon ang mga programang angay motubag sa panginahanglan sa ilang mga sakop sa baranggay.

Kahinumdoman nga una nang gihangyo ni Pres. Duterte sa Kongreso nga paspasan ang pagpalabang sa pag-oktaba sa maong piniliay.