Cebuano News: PSA mihangyo’g kooperasyon, suporta sa 2020

By Leandria Pagunsan

KapihanForum_2020CPHandPhilSys1
Si Philippine Statistics Authority (PSA) Provincial Director Engr. Ariel Fortuito (tunga) nanghangyo sa katawhan sa pagsuporta ug kooperasyon sa pagpatuman sa 2020 Census of Population and Housing (CPH) nga magsugod sa May 2020. (lpp/PIA7-Negros Oriental)

Naga-awhan og nanghangyo og kooperasyon ug suporta ang Philippine Statistics Authority (PSA) pinangulohan ni Provincial Director Engineer Ariel Fortuito nagdto sa katawhan sa Negros Oriental sa ipahigayong 2020 Census of Population and Housing (CPH) karong umalabot nga bulan sa Mayo 2020.

Sa gipahigayon nga Kapihan  sa PIA forum bag-ohay lang, si Fortuito namahayag nga ang CPH sugdan karong Mayo 4, 2020 sa tibook nasud ug gi bana-bana nga mokuha ug 100,000 ka enumerators diin kadaghanan niini langkoban sa mga maestra sa Department of Education.

Mihangyo si Fortuito sa publiko nga dawaton ug pasudlon sa ilang mga panimalay ang mga enumerators, hiktan ang mga iro ug tubagon sa insakto ang mga pangutana aron makuha ang insakto nga mga datus nga gikinahanglan sa PSA.

Makig dugtong usab ang PSA sa lokal nga buhatan sa DepEd aron mahibaw-an kung pila ka magtutudlo ang makuha isip enumerators.

Subay niini gipahibalo ni Fortuito nga ang training alang sa mga enumerators, supervisors ug uban pa nga personnel alang sa himoong 2020 CPH sugdan karong Marso 30 lahos sa Mayo 2, 2020.

Kasamtangan dugang nga himoon sa PSA ang pag pahigayon ug “massive information dissemination” aron masayran sa publiko ang kabahin sa census.

Gipaniguro usab sa PSA nga ang tanang impormasyon nga makuha gikan sa 2020 CPH himoong “strictly confidential.”

Cebuano News: Duterte, may P10T pinaskohan sa mga kawani sa gobyerno

By Elvira Bongosia

Mahimong malipayon ang pagsaulog sa Pasko sa mga kawani sa gobyerno human gilagdaan ni Presidente Rodrigo Roa Duterte ang Ad­ministrative Order No. 19 alang sa Service Re­cognition Incentive (SRI) nga dili molapas og P10,000.

Apil sa mga ma­kadawat og P10,000 in­sentibo karong Dis­yembre ang mga civilian personnel sa national government agencies, kauban ang mga nagtrabaho sa State Universities and Colleges (SUCs) ug government-owned and controlled corporations (GOCCs), mga pulis ug sundalo, bombero, mga kawani sa Bureau of Jail Ma­nagement and Penology, Bureau of Corrections, Philippine Coast Guard ug National Mapping and Resource Information Authority.

Ang mga kwalipikadong makadawat sa P10,000 mao ang mga civilian personnel nga naa sa regular, contractual ug casual positions, apan dili apil niini ang mga consultant, mga trabahante nga adunay job contracts (pakyaw) ug student trainees.

Gitumbok sa admi­nistrative order sa Presidente nga angay lamang mahatagan og pag-ila ang mga kawani sa ilang dili mahangyong kontribusyon sa paghatag og serbisyo sa publiko.

“Government emplo­yees deserve to be rewarded to recognize their collective and unceasing participation in and invaluable contribution to the Admi­nistration’s continuing efforts toward the establishment of streamlined go­vernment processes and more responsive delivery of public services,” matud pa sa direktiba ni Duterte.

Makadawat usab og SRI ang mga kawani sa lokal nga kagamhanan apil na ang mga naa sa barangay level apan mag-agad kini sa ilang nahabiling pondo.

Ang P10,000 insentibo gipaabot nga madawat sa mga kawani sa gobyerno sugod Disyembre 20.

Cebuano News: Crackdown batok illegal recruiters, gimando ni Duterte

By Elvira Bongosia

Gimanduan ni Presidente Rodrigo Duterte ang Department of Labor and Employment (DOLE) ug Department of Social Welfare and Development (DSWD) nga hingosgan ang operasyon batok sa illegal recruiters.

Sa iyang mensahe atol sa awarding ceremony alang sa Presidential Award for Child-Friendly Municipalities and Cities sa Malakanyang niadtong Biyernes, miingon ang Presidente nga angay gayud masikop ang mga illegal recruiters.

“My order is to really get them. You should know where to fish for them,” matud pa ni Duterte.

Partikular nga gimanduan sa Presidente si DSWD Kalihim Rolando Bautista sa paghimo og mas maayong paagi aron masumpo ang mga illegal recruitment.

“I’m sending him a message now that you have to do more. Since you are a military man, then I hope you can come up with a structure— a bigger one —to go after itong (illegal) recruitment. And so goes for the Department of Labor,” mensahe sa Presidente kang Bautista.

Gipahinumdom ni Duterte kun gi-unsa pagduol kaniya sa mga ginikanan sa illegally recruited teenagers nga may edad 16 ug 17 nga nakaabot sa Middle East pinaagi sa gi-pekeng mga dokumento.

Nagpahayag usab og kasubo ang Presidente sa mga naagiang pagmaltrato ug sexual abuses sa pipila ka mga Overseas Filipino Workers (OFWs).

Sa lahing mensahe sa Presidente niadtong Huwebes, gitandi ni Duterte ang mga illegal recruiters sa mga tigpayuhot og ilegal nga droga.

Kayong mga recruiter, I am putting you on the level na parang shabu rin,” matud pa ni Duterte.